Proxecto Probono 2026: abrimos a convocatoria
11 marzo 2026
Buscamos entidades sen ánimo de lucro de Galicia que necesiten apoio gratuíto en comunicación e márketing.
Desde os nosos inicios, destinamos parte do noso traballo ao noso Proxecto Probono, unha iniciativa coa que apoiamos de xeito gratuíto a organizacións sen ánimo de lucro afíns aos nosos valores, axudándoas a mellorar a súa comunicación a través de accións de márketing.
En 2026, a convocatoria volve estar aberta para todas aquelas entidades que precisen acompañamento na súa comunicación ou coa súa marca.
Servizos cos que podemos axudarvos
Podemos axudarvos co que mellor sabemos facer:
- Estratexia de márketing
- Plan de social media
- Formación en márketing online
- Campañas de publicidade
- Imaxe corporativa
- Creatividade dixital
- Etc.
Cales son os requirimentos e criterios desexables a cumprir para presentar a solicitude?
Son criterios necesarios para solicitar o Proxecto Probono:
- Ser unha entidade social ou cultural, non afiliada a ningún partido político ou relixión.
- Ter uns ingresos inferiores aos 750.000 euros anuais.
- Ter a sede en Galicia, aínda que o voso traballo se poida realizar en calquera parte do mundo.
No proceso de selección tamén consideraremos especialmente a aquelas entidades que estean comprometidas cos mesmos Obxectivos de Desenvolvemento Sostible que Nasas:
- ODS 5: Igualdade de xénero. Lograr a igualdade entre os xéneros e empoderar a todas as mullleres e nenas.
- ODS 8: Traballo decente e crecemento económico. Promover o crecemento inclusivo e sustentable e emprego e o traballo decente para todas as persoas.
- ODS 17: Alianzas para lograr os obxectivos. Revitalizar a Alianza Mundial para o Desenvolvemento Sostible.
Como podedes realizar a solicitude?
Para ser unha entidade candidata ao Proxecto Probono tedes que cubrir o formulario de solicitude antes do 30 de abril de 2026.
En maio anunciaremos a entidade seleccionada.
