Lanzamos unha nova edición de Galego de Tranquis!
25 abril 2025
Memes, linguaxe nativa de redes e, sobre todo, moitas ganas de falar galego. Iso si, sen présas
Un ano máis, levamos a cabo, xunto a Área de Normalización Lingüística da Universidade de Vigo, a campaña Galego de Tranquis, unha iniciativa que ten como obxectivo promover o uso do galego entre a mocidade, creando un ambiente favorable e acolledor para todas as persoas que desexan comezar a falalo pero encontran barreiras como o medo a non facelo ben.
Galego de Tranquis chega neste 2025 á súa terceira edición, con novas creatividades para redes sociais, colaboracións con creadoras de contido e unha nova activación do Plan de Madriñas e Padriños, mediante o cal a xente interesada en comezar a falar galego pode poñerse en contacto con "madriñas e padriños" para que lles boten unha man neste bonito camiño.
Novas creatividades e colaboración con creadoras de contido locais
A principal novidade desta edición son as creatividades que deseñamos para a campaña en redes sociais.
Dirixíndonos a un público de primeiro ano na Universidade, apostamos por adaptar ao noso obxectivo dinámicas propias da plataforma coa que a mocidade síntese máis conectada: TikTok. Cun ton divertido, seguindo o carácter desenfadado da campaña, e unha linguaxe nativa de redes sociais, as creatividades amosan situacións cotiás nas que se anima á rapazada a comezar a falar galego sen présas, aos pouquiños, de tranquis.
Para amplificar a campaña, levouse a cabo unha colaboración coa creadora de contido Ana Paz. Ana é alumna da Universidade de Vigo e comezou a falar galego hai uns poucos meses, polo que o seu perfil encaixaba á perfección para levar ao noso target a mensaxe que queríamos transmitir.
Ver esta publicación en Instagram
Ademais, dentro da fase de amplificación, realizamos unha activación de social ads dirixida ao alumnado da UVigo.
Ter a posibilidade de utilizar a nosa creatividade para achegar a lingua e a cultura galega á xente é algo de gran valor para nós. Estamos encantadas de ter a sorte de chegar a esta terceira edición de Galego de Tranquis.
Podes encontrar máis campañas creativas no noso portfolio.
